Mönnum var heitt í hamsi í viðureign Harðar á Ísafirði og Stjörnunnar í 3. flokk karla um helgina og hefur Handknattleiksdeild Stjörnunnar birt yfirlýsingu vegna málsins en samkvæmt heimildum og myndskeiði sem er í dreifingu virðist vera að þjálfari Harðar slái til þjálfara Stjörnunnar eftir leik liðana sem lauk með tíu marka sigri Harðverja. 

Í yfirlýsingunni frá félaginu kemur fram að félagið muni vísa málinu til HSÍ.

Yfirlýsing Stjörnunnar: 

"Stjórn Handknattleiksdeildar Stjörnunnar fordæmir atvik sem varð síðastliðna helgi í leik Harðar og Stjörnunnar í 3. flokki karla á Ísafirði, þar sem þjálfari Harðar veittist að þjálfara Stjörnunnar og hafði í frammi hótunum við hann.

Stjórn Handknattleiksdeildar Stjörnunnar áréttar að þjálfarar og annað starfsfólk íþróttahreyfingarinnar skuli ávallt sýna gott fordæmi í samskiptum, hvort sem er utan vallar eða innan.

Málinu verður vísað til HSÍ til þóknanlegrar meðferðar."